Sangava News

| सांगावा न्यूज | पुणे, दिनांक ३ जून २०२६ : पिंपरी-चिंचवड महापालिकेच्या वतीने थेरगाव येथे उभारण्यात येणाऱ्या अत्याधुनिक कॅन्सर हॉस्पिटलच्या नियोजनाला गती देण्यासाठी चिंचवड विधानसभा मतदारसंघाचे आमदार शंकर जगताप आणि महापालिकेच्या स्थायी समितीचे सभापती अभिषेक बारणे यांनी पुणे येथील ‘आपुलकी’ कॅन्सर हॉस्पिटलला आज भेट देत सविस्तर अभ्यास दौरा केला. सर्वसामान्य, गरीब व गरजू कॅन्सरबाधित रुग्णांना माफक दरात उच्च दर्जाच्या आरोग्यसेवा उपलब्ध करून देण्याच्या उद्देशाने पिंपरी-चिंचवड महापालिकेमार्फत थेरगाव येथे अत्याधुनिक कॅन्सर हॉस्पिटल उभारण्याचा महत्त्वाकांक्षी प्रकल्प हाती घेण्यात आला आहे. या पार्श्वभूमीवर भविष्यातील नियोजन, व्यवस्थापन आणि उपचार पद्धतींचा अभ्यास करण्यासाठी हा दौरा आयोजित करण्यात आला होता.

या प्रसंगी बोलताना आमदार शंकर जगताप यांनी सांगितले की, “आपुलकी कॅन्सर हॉस्पिटलमधील कामकाज प्रत्यक्ष पाहण्याची आणि तज्ज्ञ डॉक्टर व कर्मचाऱ्यांशी संवाद साधण्याची संधी मिळाली. या भेटीतून मिळालेली माहिती आणि अनुभव थेरगाव येथे उभारल्या जाणाऱ्या कॅन्सर हॉस्पिटलच्या उभारणीत निश्चितच उपयुक्त ठरणार आहेत.”

पिंपरी-चिंचवड शहरातील आरोग्यसेवा अधिक सक्षम करण्याच्या दिशेने उचललेले हे महत्त्वाचे पाऊल मानले जात असून, थेरगाव येथील प्रस्तावित कॅन्सर हॉस्पिटलमुळे शहरासह परिसरातील रुग्णांना मोठा दिलासा मिळण्याची अपेक्षा व्यक्त केली जात आहे.