.png)
आमदार शंकर जगताप यांच्यासह रवि भिलारे, रितू कांबळे, सिद्धेश सोनकवडे यांनी मुख्यमंत्री देवेंद्र फडणवीसांची घेतली भेट
| सांगावा न्यूज | पिंपरी चिंचवड, दिनांक १ सप्टेंबर २०२६ : ताथवडे येथे अल्पवयीन मुलींवर झालेल्या अत्याचाराच्या गंभीर घटनेच्या पार्श्वभूमीवर संबंधित आरोपीवर कठोरात कठोर कारवाई करून POCSO कायद्यानुसार जलदगती (फास्टट्रॅक) न्यायालयामार्फत प्रकरणाचा तातडीने निकाल लावावा, तसेच दोष सिद्ध झाल्यास कायद्यानुसार कठोरात कठोर शिक्षा द्यावी, अशी मागणी मुख्यमंत्र्यांकडे करण्यात आल्याची माहिती सामाजिक कार्यकर्त्या रितू कांबळे यांनी माध्यमांना दिली. या संदर्भात चिंचवड विधानसभा मतदारसंघाचे आमदार शंकर भाऊ जगताप यांच्या नेतृत्वाखाली रवि भिलारे, रितू कांबळे आणि सिद्धेश सोनकवडे यांनी मंत्रालय येथे मुख्यमंत्री देवेंद्र फडणवीस साहेब यांची भेट घेऊन निवेदन सादर केले.
यावेळी ताथवडे येथील घटनेबाबत तीव्र चिंता व्यक्त करत आरोपीविरुद्ध कायद्याच्या चौकटीत कठोरात कठोर कारवाई करण्यात यावी, तसेच पीडित मुलींना आणि त्यांच्या कुटुंबीयांना न्याय मिळवून देण्यासाठी शासनाने प्रकरणात कोणतीही दिरंगाई करू नये अशी मागणी करण्यात आली. मुख्यमंत्री देवेंद्र फडणवीस साहेब यांनी या प्रकरणाची गंभीर दखल घेत, आरोपीविरुद्ध कठोरात कठोर कायदेशीर कारवाई करण्यात येईल आणि प्रकरणाच्या कार्यवाहीत कोणतीही दिरंगाई होऊ दिली जाणार नाही, असे आश्वासन दिले.
अल्पवयीन मुलींवरील अत्याचारासारख्या गंभीर गुन्ह्यांमध्ये पीडितांना तातडीने न्याय मिळणे आणि दोषींवर कायद्यानुसार कठोर कारवाई होणे आवश्यक असल्याचे यावेळी उपस्थितांनी सांगितले. पीडित मुलींना न्याय मिळेपर्यंत हा लढा सुरूच राहील,” अशी भूमिका आमदार शंकर भाऊ जगताप यांच्यासह उपस्थित सहकाऱ्यांनी यावेळी व्यक्त केली.
कोणत्याही टिप्पण्या नाहीत:
टिप्पणी पोस्ट करा