Sangava News

| सांगावा न्यूज | पिंपरी चिंचवड, दिनांक १५ ऑगस्ट २०२६ :  ह्युमन राईट असोसिएशन फॉर प्रोटेक्शनच्या पश्चिम महाराष्ट्र प्रसिद्धी प्रमुखपदी पत्रकार श्रीधर जगताप यांची निवड करण्यात आली आहे. पत्रकारितेच्या माध्यमातून सामाजिक, शैक्षणिक, प्रशासकीय तसेच जनसामान्यांच्या विविध प्रश्नांना सातत्याने वाचा फोडण्याबरोबरच अन्यायाविरुद्ध निर्भीडपणे आवाज उठविण्याच्या त्यांच्या कार्याची दखल घेत संघटनेने त्यांच्यावर ही महत्त्वपूर्ण जबाबदारी सोपविली आहे. असे आज प्रसिद्धी पत्रकाद्वारे श्री जगताप यांनी प्रसार माध्यमांना कळविले. 

श्रीधर जगताप हे पत्रकारितेच्या माध्यमातून समाजातील विविध घटकांच्या समस्या प्रभावीपणे मांडत असून, वंचित, पीडित आणि गरजू नागरिकांच्या प्रश्नांना प्रसारमाध्यमांच्या माध्यमातून व्यापक व्यासपीठ मिळवून देण्याचे काम करीत आहेत. सामाजिक प्रश्नांचे प्रभावी वार्तांकन, प्रशासनाकडे नागरिकांच्या समस्या मांडणे आणि जनहिताच्या विषयांना प्राधान्य देणे, यामुळे त्यांची पत्रकारितेतील स्वतंत्र ओळख निर्माण झाली आहे.

मानवी हक्कांचे संरक्षण, अन्यायाविरुद्ध आवाज उठविणे आणि समाजसेवेच्या माध्यमातून नागरिकांना न्याय मिळवून देणे, ही संघटनेची प्रमुख उद्दिष्टे आहेत. या कार्याला पत्रकारितेच्या माध्यमातून अधिक व्यापक प्रसिद्धी मिळावी, तसेच मानवी हक्कांच्या विविध प्रश्नांबाबत समाजात जनजागृती निर्माण व्हावी, यासाठी जगताप यांची निवड महत्त्वपूर्ण मानली जात आहे. या निवडीबद्दल ह्युमन राईट असोसिएशन फॉर प्रोटेक्शनचे महाराष्ट्र प्रदेश उपाध्यक्ष लक्ष्मण दवणे यांनी श्रीधर जगताप यांचे अभिनंदन करून पुढील कार्यासाठी शुभेच्छा दिल्या.

“मानवी हक्कांचे संरक्षण, अन्यायाविरुद्ध आवाज आणि समाजसेवा ही संघटनेची मूलभूत उद्दिष्टे आहेत. श्रीधर जगताप यांच्या पत्रकारितेचा अनुभव, सामाजिक जाण आणि प्रभावी प्रसिद्धी कौशल्याचा संघटनेला निश्चितच फायदा होईल. त्यांच्या नेतृत्वाखाली पश्चिम महाराष्ट्रातील संघटनेचे प्रसिद्धी कार्य अधिक व्यापक, प्रभावी आणि गतिमान होईल,” असा विश्वास दवणे यांनी व्यक्त केला. जगताप यांच्या माध्यमातून संघटनेच्या सामाजिक उपक्रमांना व्यापक प्रसिद्धी मिळण्याबरोबरच मानवी हक्कांच्या प्रश्नांबाबत नागरिकांमध्ये अधिक प्रभावी जनजागृती निर्माण होईल, अशी अपेक्षा यावेळी व्यक्त करण्यात आली.

‘मानव सेवा – देश सेवा – हीच ईश्वर सेवा!’ या विचाराने प्रेरित होऊन श्रीधर जगताप यांनी संघटनेच्या माध्यमातून सामाजिक बांधिलकी अधिक प्रभावीपणे जपावी आणि मानवी हक्कांच्या संरक्षणासाठी योगदान द्यावे, अशा शुभेच्छा यावेळी पदाधिकाऱ्यांनी दिल्या.