Sangava News

जगात समाजात वावरताना स्वतःचे रक्षण स्वतः करावे लागेल, म्हणून आजचे स्वरक्षणाचे धडे विसरू नका__संगीता जगताप (प्राचार्या)

| सांगावा न्यूज | पिंपरी चिंचवड, दिनांक २९ ऑगस्ट २०२६ :  पुणे जिल्हा शिक्षण मंडळाच्या बाबुरावजी घोलप महाविद्यालय, सांगवी येथे २९ ऑगस्ट रोजी मेजर ध्यानचंद जयंती व राष्ट्रीय क्रीडा दिनानिमित्त विद्यार्थिनींसाठी स्वसंरक्षण प्रशिक्षण कार्यशाळा पार आयोजित केली. शारीरिक शिक्षण व क्रीडा विभाग, अँटी रॅगिंग सेल, आय सी सी, शिस्त समिती आणि राणीलक्ष्मीबाई ब्रिगेड यांच्या संयुक्त विद्यमाने आयोजित  घोलप महाविद्यालयात संपन्न झेलल्या विद्यार्थिनींसाठी स्वसंरक्षण प्रशिक्षण शिबिरात ८४ विद्यार्थिनी व ५० महिला प्राध्यापिकांनी सक्रीय सहभाग नोंदविला.

समन्वयक डॉ. विद्या पाठारे आणि डॉ. अमृता इनामदार यांनी महिला व विद्यार्थिनींसाठी स्वसंरक्षणाची गरज लक्षात घेता याचे महत्त्व पटवून देऊन स्वतः कार्यक्रमासाठ प्रमुख उपस्थिती दर्शविली. पाहुण्यांनी केवळ मार्गदर्शन न करता सर्व ८४ विद्यार्थिनींकडून प्रत्यक्ष प्रात्यक्षिके करून घेतली. रस्त्यात, बसमध्ये, लिफ्टमध्ये छेडछाड झाल्यास सुटका कशी करावी, हात पकडल्यास अंगठ्याच्या बाजूने हात सोडवणे, मागून हल्ला झाल्यास कोपर व टाचेने प्रतिकार करणे आणि पेन, चावीचा शस्त्र म्हणून वापर करणे याचा प्रत्येक विद्यार्थिनीने प्रत्यक्ष सराव केला. हे प्रशिक्षण केवळ प्रात्यक्षिकापुरते मर्यादित न राहता, प्रत्येकीला वैयक्तिकरित्या करून पाहण्याची संधी दिल्याने आत्मविश्वास वाढला. तसेच घरगुती हिंसा विषयी मार्गदर्शन करून १८१, ११२ हेल्पलाईन व कायद्याची माहिती उपस्थित विद्यार्थिनींना दिली.

अध्यक्षीय मनोगतामधे प्राचार्या डॉ. संगीता जगताप म्हणाल्या, "ध्यानचंद जयंतीनिमित्त क्रीडा दिन साजरा करताना विद्यार्थिनींना सक्षम बनवणे हा आमचा उद्देश आहे. महाविद्यालयात CCTV व सिव्हिल ड्रेसमधील पोलीस कॉन्स्टेबलमुळे परिसर १००% सुरक्षित आहे. तसेच महाविद्यालयात लैंगिक अत्याचार प्रतिबंध समिती (ICC) सक्रियपणे कार्यरत असून, त्रास झाल्यास विद्यार्थिनींनी घाबरू नये, त्वरित करावी, तिची ओळख गोपनीय ठेवली जाईल. बाहेरील जगात स्वतःचे रक्षण स्वतः करावे लागेल, म्हणून आजचे धडे विसरू नका."

| सांगावा न्यूज | पिंपरी चिंचवड, दि. १० जुलै २०२६ : पिंपरी चिंचवड महानगरपालिका जनसंपर्क विभागाने दिलेल्या माहितीनुसार - मोशी कचरा डेपो येथे दुर्घटनाग्रस्त झालेल्या इमारतीभोवतालचा मोठ्या प्रमाणावर असलेला मलबा हटवून इमारतीत प्रवेश करण्याचा मार्ग तयार करण्याचे काम वेगाने सुरू आहे. अधिकची यंत्रसामग्री वापरून या कामाला गती देण्यात आली असून इमारतीत अडकलेल्या सुमारे ८ नागरिकांना सुखरुप बाहेर काढण्यासाठी राष्ट्रीय आपत्ती प्रतिसाद दलाच्या मार्गदर्शनाखाली नियोजन करण्यात आले आहे. सध्या इमारतीचा अस्थिर भाग स्थिर करण्याचे काम जलद गतीने सुरू आहे. शिवाय, इमारतीच्या बाजूचा मलबा हटविण्यासाठी जेसीबी, पोकलेन आणि डंपरचा वापर केला जात आहे. इमारतीत अडकलेल्या नागरिकांच्या जीविताची दक्षता घेऊन काळजीपूर्वक ही मोहीम हाताळली जात आहे. 

घटनास्थळी प्रत्यक्ष पाहणी करून महापालिका आयुक्त डॉ. विजय सूर्यवंशी, पिंपरी चिंचवड पोलीस आयुक्त विजयकुमार चौबे आणि एनडीआरएफचे कमांडंट प्रवीण धट्ट यांनी आतापर्यंत झालेल्या कामाची माहिती घेऊन पुढील बचावकार्याच्या रणनीतीवर चर्चा केली. अडकलेल्या नागरिकांना सुखरूपपणे कसे बाहेर काढता येईल याबद्दल प्रत्यक्ष जागेवरील परिस्थिती आणि इमारतीची सद्यस्थिती याचा सर्व बाजूने विचार करून रणनीती ठरवण्यात आली आहे. 

आयुक्त डॉ. विजय सूर्यवंशी यांनी घटनास्थळी भेट देऊन प्रत्यक्ष परिस्थितीचा आढावा घेतला. बचावकार्यासाठी आवश्यक सर्व साधनसामग्री आणि मशिनरी उपलब्ध ठेऊन मशिनरी कार्यरत आहेत. घटना घडून जवळपास ४५ तासांपेक्षा अधिक कालखंड झाला आहे. त्यामुळे जलद गतीने मोहीम राबवून इमारतीत अडकलेल्या नागरिकांना सुखरुप बाहेर काढण्याचे उद्दीष्ट आहे. त्यासाठी सर्व यंत्रणांना तसे निर्देश दिले आहेत, असे आयुक्त डॉ. सूर्यवंशी म्हणाले आहेत. 

इमारतीच्या समोरील बाजूने प्रवेश करण्याचा मार्ग पूर्णपणे बंद झाला असून मागील बाजूने इमारतीत प्रवेश करण्यासाठी त्या ठिकाणचा मलबा हटवून सुरक्षित मार्ग तयार करण्याचे काम वेगाने सुरू आहे. या इमारतीत अडकलेल्या ज्या नागरिकांना सुरक्षित बाहेर काढले आहे त्यांच्याकडून माहिती घेऊन आत अडकलेले नागरिक नेमके कोणत्या जागी अडकले आहेत त्या जागेवर लक्ष केंद्रित करण्यात आले आहे. त्या ठिकाणी पोहोचण्यासाठी मार्ग तयार करण्याचे नियोजन केले आहे. त्यानुसार बचावकार्याला गती देण्यात आली आहे, अशी माहिती एनडीआरएफचे कमांडंट प्रवीण धट्ट यांनी दिली आहे. 

माजी खासदार प्रकाश आंबेडकर यांची घटनास्थळाला भेट

यादरम्यान, आज माजी खासदार प्रकाश आंबेडकर यांनीही दुर्घटनास्थळी भेट देऊन बचाव मोहिमेचा आढावा घेतला. त्यांनी महापौर रवि लांडगे आणि आयुक्त डॉ. विजय सूर्यवंशी यांच्याकडून दुर्घटना आणि सुरू असलेल्या बचावकार्याची सविस्तर माहिती घेतली. आत अडकलेल्या नागरिकांना सुखरुप बाहेर काढण्यासाठी आवश्यक त्या सर्व उपाययोजना युद्धपातळीवर राबवा असे ते म्हणाले. तसेच इमारतीत अडकलेल्या नातेवाईकांशी घटनास्थळी भेट घेऊन विचारपूस केली. यावेळी अतिरिक्त आयुक्त कुलदीप जंगम, विक्रांत बगाडे तसेच महानगरपालिकेचे वरिष्ठ अधिकारी उपस्थित होते.

महापौर रवि लांडगे यांनी घटनास्थळी पाहणी करून साधला इमारतीत अडकलेल्या नागरिकांच्या नातेवाईकांशी संवाद

आज महापौर रवि लांडगे यांनी दुर्घटनास्थळी जाऊन परिस्थितीचा आढावा घेतला. दुर्घटनाग्रस्त इमारतीमध्ये अडकलेल्या नागरिकांच्या नातेवाईकांशी त्यांनी संवाद साधत त्यांना धीर दिला. सध्या सुरू असलेल्या बचावकार्याची माहिती देत, सर्व यंत्रणा समन्वयाने आणि अत्यंत दक्षतेने कार्यरत असून अडकलेल्या प्रत्येक व्यक्तीपर्यंत सुरक्षितरीत्या पोहोचण्यासाठी प्रयत्न सुरू असल्याचे त्यांनी नातेवाईकांना सांगितले.

१६४ काेटींची टप्या-टप्याने हाेणार समायाेजन

आगाऊ भरलेली रक्कम मालमत्ता करात समायोजित केली जाणार आहे ___अभिषेक बारणे (अध्यक्ष, स्थायी समिती ; पिंपरी चिंचवड महापालिका )

| सांगावा न्यूज | पिंपरी चिंचवड, दिनांक १० जून २०२६ :  शहरातील २०२३ पूर्वी झालेल्या अनधिकृत बांधकामांना लावण्यात आलेला शास्तीकर राज्य सरकारने माफ केल्यानंतर आतापर्यंत ९६ काेटी १२ लाख रूपयांचे समायाेजन केले आहे. २०२६-२७ या वर्षात २२ हजार ९०६ मालमत्ता धारकांच्या रक्कमेचेही मालमत्ता करामध्ये समायाेजन करण्यास बुधवारी (दि.१०) स्थायी समितीने मान्यता दिली आहे. पिंपरी-चिंचवड शहरातील अनधिकृत बांधकामांना २०१२-१३ पासून शास्तीकर वसूल केला जात हाेता. ३ मार्च २०२३ रोजी राज्य शासनाने शहरातील अनधिकृत बांधकामांचा शास्तीकर माफ करण्याचा निर्णय घेतला आहे. त्यानुसार ३ मार्च २०२३ पूर्वी झालेल्या २५ हजार ६७३ अनधिकृत बांधकामांना याचा लाभ मिळाला. या मालमत्ता धारकांनी शास्तीकराची २६० काेटी ५३ लाख रूपयांची रक्कम महापालिकेकडे जमा केली हाेती.  

शास्ती कर माफीचा निर्णय झाल्यानंतर २०२३-२४ मध्ये २२ हजार ५१२ मालमत्ता धारकांना ३० काेटी ३ लाख, २०२४-२५ मध्ये २५ हजार ६७३ मालमत्ता धारकांना ३५ काेटी ९५ लाख, २०२५-२६ मध्ये २१ हजार ८२४ मालमत्ता धारकांना ३० काेटी १४ लाख असे ९६ काेटी १२ लाख रूपयांची रक्कम मालमत्ता करामध्ये समायाेजित केली. त्यानंतरही २२ हजार ९०६ मालमत्ता धारकांची १६४ काेटी ४१ लाख रूपयांची रक्कम मालमत्ता करामध्ये समायाेजित करणे बाकी आहे. त्यानुसार २०२६-२७ या आर्थिक वर्षात १६४ काेटी ४१ लाखांपैकी जेवढी शक्य आहे, त्यानुसार ती रक्कम समायाेजित केली जाणार आहे. या समायाेजनाला स्थायी समितीने बुधवारी मान्यता दिल्याची माहिती कर आकारणी व कर संकलन विभागाचे उपायुक्त सचिन पवार यांनी दिली.

"शहरातील २५ हजार ६७३ मालमत्ता धारकांनी प्रामाणिकपणे शास्तीकर भरून मालमत्ता कर महापालिकेकडे जमा केला हाेता. राज्य सरकारने २०२३ मध्ये शास्तीकर माफीचा निर्णय घेतला. त्यामुळे शास्तीकर भरलेल्या नागरिकांची रक्कम २०२३-२४ पासून त्यांच्या मालमत्ता करातून समायाेजित केली जात आहे. आतापर्यंत २६० काेटी ५३ लाखापैकी ९६ काेटी १२ लाख रूपये समायाेजन केले आहे. चालू आर्थिक वर्षात २२ हजार ९०६ मालमत्ता धारकांनी कर भरू नये. त्यांची आगाऊ भरलेली रक्कम मालमत्ता करात समायोजित केली जाणार आहे" ___अभिषेक बारणे (अध्यक्ष, स्थायी समिती. पिंपरी चिंचवड महापालिका)

"अनधिकृत बांधकाम धारकांच्या बिलामध्ये शास्ती कराचे समायाेजन केले जात आहे. ही रक्कम माेठी असल्यामुळे एका वर्षात समायाेजन हाेऊ शकत नाही. दरवर्षी मालमत्ता धारकांच्या बिलानुसार समायाेजन केले जात आहे.  २०२६-२७ या आर्थिक वर्षात २२ हजार ९०६ मालमत्ता धारकांच्या रक्कमेचे समायाेजन केले जाणार आहे. महापालिकेकडे १६४ काेटी ४१ लाख रूपये समायाेजन करणे बाकी आहे. ही रक्कम टप्या-टप्याने दरवर्षी समायाेजित केली जात आहे" ___तृप्ती सांडभोर (अतिरिक्त आयुक्त, पिंपरी चिंचवड महापालिका)

बाबूरावजी घोलप महाविद्यालयात शिवराज्याभिषेक दिन उत्साहात साजरा

| सांगावा न्यूज | पुणे, दि. ६ जून : बाबूरावजी घोलप महाविद्यालय, सांगवी येथे छत्रपती शिवाजी महाराजांच्या शिवराज्याभिषेक दिनानिमित्त विविध सांस्कृतिक व ऐतिहासिक कार्यक्रमांचे आयोजन करण्यात आले. विद्यार्थ्यांच्या उत्स्फूर्त सहभागामुळे संपूर्ण परिसरात शिवमय वातावरण निर्माण झाले.

कार्यक्रमाची सुरुवात छत्रपती शिवाजी महाराजांच्या पुतळ्याचे पूजन व पुष्पहार अर्पण करून करण्यात आली. यावेळी महाविद्यालयाच्या प्राचार्या प्रा. डॉ. संगीता जगताप, प्राध्यापक, शिक्षकेतर कर्मचारी व विद्यार्थी मोठ्या संख्येने उपस्थित होते. कार्यक्रमात विद्यार्थ्यांनी शिवचरित्रावरील भाषणे, कविता तसेच शिवकालीन लाठी-काठी कलेचे सादरीकर करून उपस्थितांची मने जिंकली. गायत्री कोळेकर हिने शिवाजी महाराजांच्या विचारांचा आजच्या तरुणांनी स्वीकार करण्याची आवश्यकता आपल्या मनोगतातून व्यक्त केली. वैष्णवी मोरे हिने शिवचरित्रावर आधारित कविता सादर केली, तर साक्षी मराठे हिने जोशपूर्ण 'शिवगर्जना' सादर करून वातावरण भारावून टाकले. याशिवाय अनेक वि‌द्यार्थ्यांनी शिवाजी महाराजांच्या जीवनकार्यावर भाषणे केली.

इतिहास विभागप्रमुख डॉ. जितेंद्र वडशिंगकर यांनी शिवराज्याभिषेक दिनाचे ऐतिहासिक महत्त्व विशद केले. त्यांनी शिवाजी महाराजांच्या राज्याभिषेकामुळे हिंदवी स्वराज्याला मिळालेली वैधता आणि त्याचे सामाजिक-राजकीय परिणाम याविषयी मार्गदर्शन केले. प्राचार्या प्रा. डॉ. संगीता जगताप यांनी आपल्या अध्यक्षीय मनोगतात छत्रपती शिवाजी महाराजांच्या स्वराज्य स्थापनेतील कार्याचा गौरव करत वि‌द्यार्थ्यांनी त्यांच्या आदर्शाचा अंगीकार करून राष्ट्रनिर्माणात योगदान द्यावे, असे आवाहन केले. कार्यक्रमाच्या समारोपप्रसंगी विद्यार्थी वैभव सोलंकी व चि. कौशल कुंजीर यांनी शिवकालीन लाठी-काठी कलेचे प्रभावी प्रात्यक्षिक सादर करून छत्रपती शिवाजी महाराजांना मानवंदना अर्पण केली. यावेळी वि‌द्यार्थ्यांनी शिवाजी महाराजांच्या विचारांचे स्मरण करत राष्ट्रसेवा व समाजहितासाठी कार्य करण्याचा संकल्प केला.

-------------------SANGAVA NEWS-------------------

Official Contact Number : 8263083329

Email : sangavanews19@gmail.com

विनय सोनवणे (MJMC)संपादक, सांगावा न्यूज

_________________________________________